صلاح مش مصري !!!!!!!!!!

صلاح مش مصري !!!!!!!!!!

صلاح يتوج احسن لاعب افريقي في حفل جوائز الاتحاد الافريقي

صلاح مش مصري !!!!!!!!!!

كنت مرتب موضوع تاني اتكلم فيه و قولت مش لازم اتكلم عن صلاح خوفاً من التكرار لأن كل الناس بتتكلم عنه لكن غيرت رأيي لأنه بصراحة يستحق كلنا نتكلم عليه لسنين كتير بسبب انجازاته التاريخية اللي لسه هتكمل ان شاء الله في ٢٠١٨ هنشوف صلاح في حفلة الفيفا مترشح مع ميسي و نيمار ( لان السنه دي غالباً مفيش رونالدو )

اول حاجه الحفلة كانت قوية جداً و بدايه مهمة لرئيس الاتحاد الافريقي الجديد احمد احمد بغض النظر عن الاغاني ( اللي معجبتش ناس كتير ) لكن الحفلة طفرة بسبب الاهتمام من رئيس غانا و دعوة اساطير القارة علي عكس عيسي حياتو اللي كان علي خلاف دائم مع النجوم ، لدرجة ان اغلب اللاعبين المدعوين كانوا بيغيبوا عن الحفل في السابق ، بالاضافة الي اقناعه نادي ليفربول بارسال اثنين من اهم لاعبيه الي غانا قبل ٢٤ من ديربي الميرسي سايد في الدور الثالث لكأس انجلترا .

اما بالنسبة للنتائج فوز كوبر مفاجئة و فوز منتخب مصر شبه مفاجئة لكن الاتنين دليل علي تحسن موقف مصر في الاتحاد الافريقي بعد سنين الخلاف مع حياتو بسبب موضوع ارض مقر الاتحاد من ٢٠١١ ، و دليل علي قوة و نفوذ هاني ابو ريدة ، فوز صلاح مستحق و متوقع نظراً للمستوي الرائع و الارقام المذهلة للفرعون المصري في ٢٠١٧ و لولا صلاح لم يكن كوبر و المنتخب ليفوزا بالجائزتين .

صلاح فعلاً مش مصري ، غالباً صلاح اصله فرعوني مش عربي ، حقيقي نموذج مشرف للانسان عموماً بغض النظر عن الجنسية ، ما شاء الله عليه نموذجي في كل حاجة ، ميدو امبارح قال كلمة حكمة " صلاح اصبح حالة " فعلاً اصبح ملهم لجيل و شعب مطحون و شباب املهم اصبح ضعيف في مستقبل مشرق ، لكن قصة صلاح و نجاحه فعلاً ممكن تدي أمل لكتير من الشباب .

من بسيون للقاهرة لبازل و بعديها لندن ثم فلورنسا ثم روما و اخيراً ليفربول ، صلاح هو صلاح نفس الاجتهاد و المثابرة و الحماس و الجدية و الالتزام بنفس الروح المرحة والضحكة اللطيفة ، سريع في التأقلم مع اللاعبين و المدربين و كل الجماهير بتحبه ، نجح في كل الاندية حتي تشيلسي صلاح لم يفشل لكن مورينيو لم ينجح في توظيفه و اكبر دليل ان في مشاركاته القليله ترك بصمه و منقدرش ننسي هدفه في مرمي بيتر تشيك ، و بما اني تشيلساوي بيع صلاح و دي برويني من اكبر غلطات ادارة تشيلسي.

انا متابع جيد للصحافة الرياضية الغربية ، كل زملاءه في كل الاندية بتشيد باخلاقه و التزامه ، و عمري ما حسيت ان في لاعب علاقته مش جيدة بصلاح حتي الملك توتي المغرور كان بيتكلم كويس عن نجمنا المتواضع ، صلاح شخص محترف بكل ما تحمله الكلمة من معني موهوب ، مجتهد ، منظم ، طموح .عمري ما سمعت صلاح بيشتكي من مدرب و علاقته بمورينيو خير دليل ، و لا عمره اشتكي من الظروف و لا الجو و لا الوحدة رغم انه سافر صغير و راح سويسرا و مادراك ما سويسرا , غالبا حصلو صدمة حضارية لكنه تغلب عليها ، عكس اغلب اللاعبين المصريين المحترفين اللي غالباً بيفشلوا في التأقلم و بيرجعوا عند اول عرض مصري من الاهلي او الزمالك ، صلاح خلطة غريبة من مهارة الخطيب و اخلاق ابو تريكة و انفتاح ميدو و عقلية هاني رمزي .

صلاح بيشتغل علي نفسه و بيعالج مشاكله بنفسه ، اكبر عيوبه كانت اهدارالفرص و خصوصاً الانفرادات ، اشتغل علي نفسه و اتمرن فردي كتير لحد ما اصبح بينافس هاري كين علي صدارة هدافي البريميرلييج اللي بشهادة الجميع احسن دوري في اوروبا .صلاح سافر و هو مقرر انه هينجح بتوفيق ربنا و مش راجع الا و هو محقق حلمه ، تصريحاته امس ان الجائزة مش نهاية الرحلة بل بالعكس عايز يكسبها تاني مرة و اتنين و عشرة ، صلاح مان خجول جذاً في بداياته لكن بذكائه عرف ان الخجل ممكن يأثر عليه اتعلم انجليزي كويس و اخد الجرأة و بقي بيهزر مع الصحفيين كمان.

لقطة مباراة الكونغو لما وقع بعد هدف التعادل توضح مدي حماسه و قام بسرعة كالمحارب علشان يحاول يحقق حلمه بالعزيمة مش بالكلام ، ربنا حميه و يحفظه و يكملوا علي خير دعوة امه " روح يابني ربنا يحبب فيك خلقه "

علشان كده صلاح مش مصري لان للاسف قليل من المصريين اللي قابلتهم فيه كل الصفات دي و كمان متواضع و بسيط ، صلاح زي برشلونة " أكثر من مجرد لاعب كرة قدم ، صلاح ملهم الجيل "و علي فكرة ده مش عيب في بلاد كتير الرياضيين فيها ملهمين و اصحاب تأثير و علي سبيل المثال اوسين بولت و جورج وياه رئيس ليبريا المنتخب منذ اسبوعين .

بس برده مش لازم ننسي ان نجاح صلاح مش تخطيط اتحاد كورة او منظومة رياضه , نجاح صلاح حاله فردية بسبب موهبته و شخصيته و توفيق ربنا , يعني مصر مبقتش قوة كروية ولا الكلام الفاضي ده احنا لسه ماشيين بالبركة بس في ناس بتشتغل باحتراف بس لسه المشوار طويل للتطوير .

ان شاء الله ليه هنشوف منه كتير لانه تألقه جاء في التوقيت الصحيح ، بس نفسي يكملومع ليفربول و يحقق الحلم اللي مقدرش ستيفان جيرارد يحققه و هو الفوز بالبريميرلييج و لو حصل هيعملو لصلاح تمثال في الانفيلد

مفيش علي السريع الاسبوع ده ، حقيقي مفيش حاجه تستاهل نكلم عليها غير الفرعون صلاح ، حقيقي الواحد فخور بالراجل ده و ربنا يكرمه و يسعدنا جميعاً و كأس العالم فرصة مناسبة جداً ان شاء الله.

تجدون beIN SPORTS على

متوافق مع الهاتف الذكي والكمبيوتر اللوحي

Iphone & iPad

اشتركوا في المجلة الأسبوعية

مقابلة

فهد العتيبي

تتيح لكم خدمة Your Zone الفرصة لطرح أسئلتكم على فهد العتيبي

كيف يتم ذلك؟ تسجلوا في beIN SPORTS Your Zone وكونوا على موعد مع "المقابلة"، وسيتم طرح أفضل الأسئلة على ضيفنا!

تسجيل